«Ello foi una vegada, allá pel sieglu VI, un monxu y
marín irlandés llamáu Samalandrán, en compañía de 14 monxos, decidió embarcase a
la gueta de la islla’l paraísu terrenal. Dempués d'analayar demientres siete
años pel Océanu Atlánticu, atoparon con una mar de tiniebles, desnortiaos,
decidieron dexar el timón en manos de la voluntá divina y la nueche del sábadu
Pascua, apaecieron nel llugar más maraviyosu que podáis imaxinar.
Una pequeña islla metanes un estuariu apináu d’aves
formoses, arrodiáu de grandes viesques y praderíes floríes, au celebraron la
Pascua compartiendo unos panes alredor d'una fumaza. Dempués d'un tiempu, con
gran pesar, tornaron a Irlanda.
Y cunta la lleenda, qu'esta islla llamada Samalandrán,
tien el don d'apaecer y sumir. Unos dicen que cuando los monxos encendieron la
foguera, la islla escomenzó a movese y somorguiós. Yera un pexe monstruosu
llamáu "Jasconius", que dalgunos identifiquen con una escomunal ballena.
Otros señalen, que se trataba d'una islla viaxera, un inmensu navíu de la
natura capaz de salear al antoxu del marín irlandés.
Nun sabemos si'l monxu sigue peles mares enriba d'una
ballena o d'esta enigmática islla que va al debalu, pero lo que sí sabemos, ye
que la nueche de Pascua, al amechar les fumaces, escúchense campanes sonar nel
llugar qu'enantes ocupaba la misteriosa Islla de Samalandrán. Festexando
asina'l regresu del míticu marín irlandés a la islla del paraísu natural, pa
compartir de nuevu los panes de Pascua, como símbolu de convivencia, pa
celebrar la llegada de la lluminosa y allegre primavera»
Testu: Víctor Raúl Pintado Rey -Vitu-
(Lleenda culta ellaborada a partir de les
entrevistes y les referencies escrites de: Milio
Mariño, Alberto del Río, José Manuel Feito, José Rodil Díaz y Rubén Arias).
|
No hay comentarios:
Publicar un comentario